ត្រីកំភ្លាញ

កំណាព្យនេះមានលំនាំបទពាក្យប្រាំពីរ និពន្ធដោយប៉ារបស់ខ្ញុំក្នុងឆ្នាំ ១៩៩៤ ។

ត្រីកំភ្លាញ

• កំភ្លាញកំភ្លងពងកំផ្លេស     កំភ្លាញបបេះបបិចនុយ

កំភ្លាញឃើញភ្លែតស្ទែតស្ទុះស្ទុយ     ខំតម្លើងព្រុយកន្ទុយបក់ ។

• កំភ្លាញក្នុងបឹងប្រឹងព្រោកប្រាជ្ញ     លោលោតបាចសាចហែបហែលហក់

រង្គើកំប្លោកព្រលឹតកក់     ទឹកល្អប្រែល្អក់ទាំងល្ងាចព្រឹក ។

• ប្រិចចុះប្រិចឡើងប៉ើងទឹកខ្ចាយ     សប្បាយក្អាកក្អាយក្អែព្រួសទឹក

ហាក់សម្បូរណ៍ត្រីធំពន្លឹក     ច្របល់វរវឹកវិលទឹកបឹង ។

• ក្រុមអ្នកនេសាទសង្វាតដែរ     មកដល់ហូរហែបែរសម្លឹង

រៀបរយប្រដាប់ចាប់យួរញ៉ឹង     ស្វះស្វែងប្រែងប្រឹងរុតដួសដង ។

• ខ្លះកៀរខ្លះកាប់ចាប់នឹងដៃ     ខ្លះប្រឌិតច្នៃអួនអញ្ចង

ល្អក់វល់ពុលងាប់កំភ្លាញផង     ឆ្លេឆ្លាចូលថ្នងម្ជូរស្លឹកថ្នឹង ។

 

ស្នាមស្នេហ៍អូន

នេះជាកំណាព្យមួយផ្សេងទៀត ដែលប៉ាខ្ញុំបានតែងក្នុងឆ្នាំ ១៩៨៩ ។ កំណាព្យនេះមានឈ្មោះថា ស្នាមស្នេហ៍អូន ជាបទពាក្យប្រាំបួន បែបជាប់ទង ។

 
ខ្វង់ចិញ្ចើម     ឆ្នើមថ្ពាល់ខួច     ស្រួចនេសា
ភ្លឺនេត្រា     ថ្លាថ្លោសសាច់     ផ្តាច់ផែនដី
រន្ធត់ចិត្ត     ត្បិតសម្ផស្ស     ស្រស់ពិសី
កម្មលោកីយ៍     អីមកកាត់     បាត់នួនល្អង ។

 

ផ្អែមសំដី     ស្រីបោសបម     ថ្នមមាសស្និទ្ធ
ផ្តេកផ្តួលផ្តិត     កិតកាយា     ណាមាសបង
ធ្លាប់សាស័ព្ទ     ស្តាប់ឥតល្អៀង     សៀងសាសង
ចង់ត្រកង     ប៉ងមេត្រី     ស្រីពិសិដ្ឋ ។

 

ខ្មៅកេសា     ផ្កាក្រហម     អមសក់ក្រង
ចារចំណង     ចងចំណាំ     ចាំ-ចំ-ណិត
ក្លុំចង្កេះ     ឆេះឆាបឆួល     អួលដួងចិត្ត
សូមអាណិត     ដ្បិតដក់ដាម     ស្នាមស្នេហ៍អូន ។

 

អ៊ា-ចន្ទ្រ-ត្រោ !

ល្ងាចម៉ិញប៉ា-ម៉ាក់បានទូរស័ព្ឌមកលេង ខ្ញុំណឹងក៏តាំងតែនឹកផ្ទះ នឹកបងប្អូនដែលធ្លាប់តែនៅជាមួយគ្នា ក្រោយមកទៀតក៏ នឹកឃើញកំណាព្យរបស់ប៉ា ដែលគាត់បានតែងជាយូរមកហើយ ក៏ចង់យកមកដាក់ ដើម្បីចែកអ្នកទាំងអស់គ្នាមើលកំសាន្ត ។ កំណាព្យនេះមានឈ្មោះថា អ៊ា-ចន្ទ្រ-ត្រោ ជាលំនាំបទពាក្យ ៩ បែបជាប់ទង ដែលគាត់បានតែងក្នុងឆ្នាំ ១៩៨៧ ។

 

អ៊ា-ចន្ទ្រ-ត្រោ !

 

ទក-រ-លឹក     ស៊ឹក-រ-ឡែន     សែនអាល័យ

ហេតុនិស្ស័យ     ច្នៃសំរិត     ចិត្តជីវ៉ា

ពិតប៉ុនប៉ង     ផ្សងជួបជួន     នួនសង្សារ

បើបរា     ស្មាលាស្នេហ៏     បែរបែកបង ។

 

ចន្ទ្រឧត្តម     ហំ-ហែ-ហម     អមដោយផ្កាយ

ថ្វីខ្ពស់ឆ្ងាយ     កាយហាក់ជិត     និត្យនួនល្ងង

ចង់សាស័ព្ទ     ស្តាប់សំនៀង     សៀងសាសង

បែ-សែន-ស្នង     បងស្មោះសរ     ល្អល្អន់ល្អិត ។

 

ឯមេឃា     អ៊ា-ចន្ទ្រ-ត្រោ     ឱចន្ទ្រា

កាយកំពា្រ     ស៊ា-រ-ង៉ែន     ដែនដួងចិត្ត

ប្រើ-សិន-ប     ប្រសិនបាន     ប្រាណស្នេហ៏ស្និទ្ធ

មកផ្តេកផ្តិត     កិតកាយា     ថ្លា-កមល ។

 

ប្រួន-សិន-ណ     ប្រសិនអ្នក     ជាក់ចងចាំ

បើគ្មានកម្ម     ឆ្នាំយូរលង់     គង់តែដល់

ចិត្តសច្ចា     ថាសច្ចៈ     ស្ម័គ្រឥតខ្វល់

កែវកុំឆ្ងល់     អល់អែកអី     ស្តីបងស្តាប់ ។