ខែ តុលា 30, 2009
ខាងក្រោមជាសមិទ្ធផលដែលខ្ញុំបានផ្ដើមធ្វើសម្រាប់ខួបកំណើតប៉ាតាំងពីប៉ុន្មានពីរខែមុន ។ ខ្ញុំបានបញ្ចប់វាមួយខែហើយ តែអត់មានពេលយកទៅដាក់ស៊ុម ។ ឥឡូវខ្ញុំកំពុងតែធ្វើរូបមួយផ្សេងទៀតសម្រាប់មិត្តភក្តិ ជាចំណងដៃដល់បុត្រតូចរបស់គេដែលនឹងសម្រាលប៉ុន្មានថ្ងៃទៀតនេះ ។
Scarlet Minivet - final
ខែ កញ្ញា 5, 2009
អ្វីដែលខ្ញុំប្រឹងឆ្លៀតធ្វើពេលទំនេរសំរាប់ថ្ងៃខួបកំណើតប៉ាប៉ា ឥឡូវនេះចេញរូបរៀងប៉ុណ្ណេះហើយ ។ សង្ឃឹមថានឹងធ្វើអោយហើយក្នុងពេលឆាប់ៗនេះ នឹងអាលចាប់ផ្ដើមរូបមួយទៀត ដែលត្រៀមធ្វើសំរាប់បងស្រម៉ូមខ្ញុំ ។
Scarlet Minivet ដែលខ្ញុំកំពុងធ្វើ
Scarlet Minivet - parttern
ខែ សីហា 28, 2009
ខ្ញុំមិនដឹងថា តើអ្នកផ្សេងធ្លាប់មានអារម្មរណ៍ដូចខ្ញុំ ឬ អត់ តែមួយរយៈនេះ ខ្ញុំពិតជាមានអារម្មណ៍ថា មិនចូលចិត្តបរិយាកាសនៅកន្លែងធ្វើការរបស់ខ្ញុំទាល់តែសោះ ។ រាល់ព្រឹកដែលខ្ញុំដើរទៅធ្វើការ ខ្ញុំមានអារម្មណ៍ថា ខ្ញុំត្រូវទៅប្រឈមមុខនឹងអ្វីដែលខ្ញុំមិនចូលចិត្ត ។ អ្វីដែលខ្ញុំមិនចូលចិត្តនោះ មិនមែនការងារនោះឡើយ គឺមិនចូលចិត្តមនុស្សដែលធ្វើការជាមួយ ។ ខ្ញុំមានការងារច្រើនត្រូវធ្វើជារៀងរាល់ថ្ងៃ ខ្ញុំចង់ផ្តោតនឹងការងាររបស់ខ្ញុំ តែពេលខ្លះពិតជាពិបាកណាស់ ព្រោះខ្ញុំធ្វើការជាមួយមនុស្សដែលមិនចេះយល់ពីមនុស្សដទៃ ។
ក្នុងផ្នែករបស់ខ្ញុំ មានបុគ្គលិកអង្គុយធ្វើការជុំគ្នាប្រាំនាក់ ប៉ុន្តែក្នុងនោះមានមនុស្សម្នាក់ចូលចិត្តនិយាយខ្លាំងៗ ដាក់សំលេងទូរស័ព្ឌរោទិ៍ខ្លាំងៗ បើកចំរៀងក្នុងម៉ោងធ្វើការខ្លាំងៗ ។ កន្លងមក ខ្ញុំបានសួរអ្នកផ្សេងទៀតថា តើគេអត់មានបញ្ហាទេ នៅពេលអ្នកនោះតែងតែ និយាយទូរស័ព្ឌ ដាក់សំលេងទូរស័ព្ឌ និង បើកចំរៀងលឺៗដូច្នេះ? បីនាក់ក្នុងនោះថា គេទើសចិត្តណាស់ តែគេមិនដែលនិយាយស្អីថាឲ្យអ្នកនោះឡើយ មានតែទ្រាំ ។ អញ្ចឹងខ្ញុំក៏ទ្រាំជាមួយគេដែរទៅ ។ ខ្ញុំបានទ្រាំអស់រយៈពេលជិតមួយឆ្នាំកន្លះ ហើយពេលនេះ ខ្ញុំមិនអាចទ្រាំបានទៀតទេ ។ នៅពេលដែលខ្ញុំទ្រាំលែងបាន ខ្ញុំមានអារម្មណ៍ថា ស្អប់កន្លែងធ្វើការ (មិនចូលចិត្តមនុស្ស មិនមែនការងារនោះទេ) ។ ខ្ញុំមានអារម្មណ៍ខ្សោយ ឆាប់ភ្ញាក់ (ញ័រដៃជើង និង បេះដូង នៅពេលលឺសំលេងទូរស័ព្ឌគេរោទិ៍ម្តងៗ) ព្រោះសំលេងខ្លាំងៗរាល់ថ្ងៃ ។ ខ្ញុំធ្លាប់ប្រាប់គេជាច្រើនដង អោយបន្ថយសំលេងទូរស័ព្ឌ និង ចំរៀងរបស់គេ ប្រសិនបើគេអង្គុយក្នុងការិយាល័យ តែគេបែថាអោយខ្ញុំវិញថា “ you’re very sensitive” ។ oh! ឥឡូវខ្ញុំជាអ្នក sensitive??
ខ្ញុំចង់ប្រាប់ manager ពីអារម្មណ៍របស់ខ្ញុំ តែខ្លាចពេលត្រូវ confront ជាមួយគេម្ដងទៀត ។ ខ្ញុំពិតជាទើសចិត្តមែនទែន នៅពេលខ្ញុំត្រូវធ្វើការជាមួយពួកអាស៊ីដូចគ្នា ព្រោះមានការលំបាក់ក្នុងការប្រឈមមុខគ្នា មិនដូចធ្វើការជាមួយពួកស្បែកស ឲ្យតែប្រឈមមុខដាក់គ្នាចប់ហើយ គឺអ្វីៗចប់ដែរ ។
គិតៗទៅ តើខ្ញុំពិតជា sensitive មែន?
ខែ សីហា 22, 2009
ហេហេ សូមកុំច្រឡំថាជាបទល្មើសលួច ឬ ប្លន់អីនោះ ។ បទល្មើសនោះ គឺខ្ញុំបានហូបរបស់ដែលមិនគួរហូបនោះណា៎ ។ មើលទៅផែនការណ៍សំរកទំងន់ខ្ញុំ ត្រូវបរាជ័យហើយ ព្រោះអោយតែដើរកាត់ហាងនេះ ខ្ញុំចេះតែទន់ជើងអញ្ចឹង ។ នេះខ្ញុំអត់ហ៊ាន កម្ម៉ង់ច្រើនផង ត្រឹមតែ double cheese burger ប៉ុណ្ណោះ 
ខែ សីហា 13, 2009
ម្សិលម៉ិញជាថ្ងៃសំរាកពីការងារ ព្រោះជាថ្ងៃម្ដាយ (នៅស្រុកថៃ) អញ្ចឹងខ្ញុំក៏បានទៅដើរលេងជាមួយប្រុសក្មេងពីរនាក់ ។ ពីរនាក់នោះគឺគ្មាននរណាក្រៅពីប្អូនសុវុឌ្ឍី និង មង្គល ដែលជាមិត្តភក្តិរបស់ខ្ញុំនោះទេ ។ គួរអោយអនិច្ចាណាស់ ដែលបីនាក់ដើរម៉ង់ៗ កណ្ដាលថ្ងៃត្រង់ក្ដៅ ចង់បែកក្រហែងក្បាលនោះ ។ ពេលមកដល់ផ្ទះវិញ ទើបខ្ញុំដឹងថា ដៃខ្ញុំទាំងពីររលាកថ្ងៃ ឡើងក្រហម ដូចជ្រូកខ្វៃអញ្ចឹង ។ គិតចុះ គិតឡើង យើងទាំងបីនាក់សម្រេចទៅដើរលេងនៅផ្សារអណ្ដែតទឹកជុំគ្នាម្ដងទៀតថ្ងៃសៅរ៍នេះ ។ ហេហេ តែប៉ុណ្ណេះ ខ្ញុំគេចរៀន ទៅដើរលេងទៀតហើយ ។ ខាងក្រោម ជារូបភាពខ្លះៗពីដំណើរកំសាន្ដទៅវត្តអរុណ និង ព្រះបរមរាជវាំង ។
វត្តអរុណ ថតពីត្រើយម្ខាងទន្លេ ចាផាយ៉ា
ផ្ការាំងភ្នំ (ខ្ញុំខានឃើញផ្កានេះ ២៥ ជាងហើយ)
វគ្គប្រុសខ្ពស់ ស្រីទាប (ប្អូនវុឌ្ឍី និង ខ្ញុំ)
មង្គល និង ខ្ញុំ (អ្នកខ្លះសុទ្ធតែថា បងៗខ្ញុំសុំឈរក្រោយ កុំឲ្យឃើញធាត់ពេក)
ព្រះបរមរាជវាំងថៃ
រូបតំណាងអង្គរវត្តខ្មែរ ក្នុងវាំងរបស់ថៃ
ខែ កក្កដា 17, 2009
ហាហាហា អាចាស់ធ្វើមិនទាន់រួចផង ស្រាប់តែអាថ្មីដែលទើបតែកាម៉្មង់នោះ មកដល់ទៅហើយ ។ ទាំងនេះជាអ្វីដែលខ្ញុំគ្រោងធ្វើ បន្ទាប់ពីការងារពេញម៉ោងរបស់ខ្ញុំ ។ តាមពិតទៅវាមិនមែនជាការងារក្រៅម៉ោងដើម្បីលុយស្អីនោះទេ ។ វាគ្រាន់តែជាការងារទុកគ្រាន់កំដរអផ្សុក ឬ ធ្វើជាអំណោយសម្រាប់អ្នកណាម្នាក់តែប៉ុណ្ណោះ ។ ទាំងនេះជា pattern cross stitch ដែលទើបតែមកដល់ ។
cross stitch នេះខ្ញុំនឹងធ្វើសំរាប់ថ្ងៃខួបកំណើតប៉ា
cross stitch នេះខ្ញុំនឹងធ្វើសំរាប់បងសំលាញ់
cross stitch នេះខ្ញុំនឹងធ្វើសំរាប់មិត្តរួមការងារជនជាតិភូមា
ខែ មិថុនា 2, 2009
ថ្វីត្បិតតែពេលនេះមេឃកំពុងតែរលឹមក៏ដោយ ក៏នៅមានស្រមោលដួងខែរះព្រាលៗដែរ ។ ដល់តែយប់ស្ងាត់លឺតែសម្លេងកង្កែប គង្គក់ និង ហ៊ីងអញ្ចឹងទៅ ដូចមានអារម្មណ៍ស្រងេះស្រងោចពីរឿងអ្វីមួយយ៉ាងម៉េចទេ ។ តើខ្ញុំកំពុងតែនឹកអីគេហ្នឹង?? ចម្លើយគឺអត់ដឹងផង ។
ដួងខែព្រាលៗពីបន្ទប់របស់ខ្ញុំ
ខែ ឧសភា 3, 2009
ថ្ងៃនេះសុំរអ៊ូដាក់ wordpress បន្តិចហើយ ។ និយាយពីរឿងស៊យ ខ្ញុំមិនដែលស៊យអីដូចអាទិត្យនេះសោះ ។ ការងារនោះធ្វើមិនទាន់សោះ ។ ងាកដល់ថ្ងៃ public holiday ងាកចុងអាទិត្យ ងាកដល់ថ្ងៃ deadline ត្រូវប្រគល់ការងារអោយគេវិញ រកតែធ្វើអីក៏មិនទាន់ ចាប់នេះក៏ខុស ចាប់នោះក៏ខុស មិនដឹងធ្វើមួយណាទុកមួយណាមុន ។ ដល់តែរវល់ដកដង្ហើមមិនទាន់ហើយ ឆ្លៀត laptop តៃស្មឹងអស់មួយអាទិត្យ រកតែធ្វើអ្វីក៏មិនបាន ។
កាលពីថ្ងៃសុក្រក៏យក laptop ទៅ IT Plaza បម្រុងនឹងលក់ ស្រាប់តែគេអោយថ្លៃមិនដល់មួយរយដុល្លាផង (ស្លាប់ អីក៏ថោកម្ល៉េះ!) ។ គេថាថោកព្រោះម៉ាស៊ីនខ្ញុំខូច motherboard ហើយខ្ញុំមិនអោយ hard drive ទៅគេទៀត ។ ដើរចុះដើរឡើង ស្រាប់តែមានហាងមួយនោះគេប្រាប់ថា គេមាន spare parts អាចផ្លាស់ប្តូរបាន ។ គិតចុះគិតឡើង មិនបាច់លក់ទេ យកវាទៅជួសជុលវិញ ក្រែងលោរប្រើវាបានមួយរយៈទៀត ។ អើបើជ្រុលជាធ្វើ ប្តូរ hard drive យកអា 320 GB និង ថែម ram 2GB មួយដើមទៀតមើរ ។ គ្រាន់តែអង្គុយចាំយកម៉ាស៊ីនវិញឡើង ៩ម៉ោង (អង្គុយចង់ក្រិនគូថដូចស្វា) ។ យកមកដល់ផ្ទះមិនទាន់បានធ្វើអីវាផង ស្រាប់តែបើកទៅវា error softwares ទាំងអស់ ។
ថ្ងៃសៅរ៍ឡើង ត្រូវទៅកន្លែងគេជួសជុលម្តងទៀត ដើម្បី reinstall window ។ គ្រាន់តែ reinstall ហើយភ្លាម លើកម៉ាស៊ីនដាក់កាបូបយកមកផ្ទះភ្លាម (អត់ខ្ចី test អីមួយបន្តិច ហេតុតែទុកចិត្តជាង) ។ យកមកដល់ផ្ទះស្អីក៏បើកចេញដែរ លើកលែងទេ IE បើកមិនចេញសោះ ។ ទូរសព្ឌទៅសួរជាង ជាងថាត្រូវយកទៅអោយគេមើលម្តងទៀត ។
ថ្ងៃអាទិត្យក៏យកទៅអោយគេមើល ដល់តែសួរជាងថា window vista ដែលអ្នកឯងដាក់អោយខ្ញុំមាន lincense ឬ អត់ ស្រាប់តែគេថា “ អត់មានផង” ។ ស្លាប់តែម្តងជាងនេះ ចេះធ្វើឬករាក់កំភែលអញ្ចឹងកើត ។ ដល់ពេលនេះចង់លក់ក៏លក់លែងកើតហើយ ព្រោះចាយលុយអស់ មួយម៉ឺនបាតលើវាទៅហើយ មានតែទ្រាំប្រើវាទៀតទៅ ។ សូមផ្តាំញាតិទាំងឡាយ បើចង់ទិញ laptop សូមកុំទិញអាស៊េរី HP dv2000 អោយសោះ យ៉ាប់ណាស់ ខាតលុយអត់អំពើ ។
ដល់តែពេលស៊យ ធ្វើអីក៏មិនបានដូចបំណង ។ បែរជាជិះឡានក្រុង ឈប់ហួសចំណត ដើរបកក្រោយហត់ចង់ដាច់ខ្យល់ ។ ដល់ជិះ sky train ក៏ឈប់ហួសចំណតទៀត ។ អាកាបូបដាក់ laptop នោះក៏ធ្ងន់ដូចស្ពាយកូនដំរីមួយ ។ នេះជាអាទិត្យដ៏ stress បំផុត ។ (បានរអ៊ូហើយ ដូចធូរចិត្តបន្តិច)
អាណិតតែជើង និង ស្បែកជើង ។ បើវាចេះរអ៊ូ មិនដឹងជាវារអ៊ូយ៉ាងណាទេ ។
ខែ មេសា 21, 2009
ក្រៅពីធ្វើម្ហូប ដាំផ្កា ធ្វើ cross stitch ក៏ជាអ្វីដែលខ្ញុំចូលចិត្តធ្វើក្នុងពេលទំនេរដែរ ។ វាមើលទៅដូចជាងាយ តែត្រូវការអំណត់ច្រើន ។ ខ្ញុំបានធ្វើរូបហើយជាច្រើន តែមិនមានជាប់មកជាមួយឡើយ ។ ខាងក្រោមគឺជាអ្វីដែលខ្ញុំធ្វើ តែមិនទាន់មានពេលទំនេរដើម្បីបញ្ចប់វា ។
catalogue និង ប្រអប់សម្រាប់ដាក់អំបោះ
pattern និង ផ្ទាំងរូប តែមិនទាន់ចាក់រូបស្មៅចប់ និង backstitch
ប្រសិនបើអ្នកចង់រៀនធ្វើ cross stitch, clips in youtube នេះនឹងបង្រៀនពីការចាប់ផ្តើមដំបូង ។
ខែ មករា 19, 2009
នេះជារូបថតខ្លះៗពីដំណើរកំសាន្តក្នុងស្រុកខ្មែរអស់រយៈពេលបីអាទិត្យ ។
រូបថតនៅអង្គរធំ
រូបថតនៅអង្គរធំ
ផ្លូវចូលប្រាសាទព្រះខ័ន (ក្នុងកន្រ្តកនេះមានកង្កែប)
រូបថតរបស់យើងក្នុងប្រាសាទព្រះខ័ន
ឆ្នេរលំហែកាយ ក្រុងព្រះសីហនុ
កេសី